Aguest diuendres 28 de junh, entàs 22 ores, era transmission en dirècte dera opèra Tosca de Puccini se poderà veir ena façada dera glèisa de Sant Joan d’Arties

Vielha, 27 de junh de 2019.- Per dusau an consecutiu, es Musèus dera Val d’Aran damb er Ajuntament deth Naut Aran se higen ara iniciativa deth Liceu a la fresca, damb er objectiu de difóner era cultura operistica e hèr-la accessibla ath major nombre de persones d’ua manèra gratuïta. Eth lòc escuelhut a estat era glèisa e sala d’exposicions de Sant Joan d’Arties, equipament museïstic e referent culturau en territòri, que permet plaçar ua pantalha de granes dimensions ena sua façada, ath delà d’auer capacitat d’acuélher ath torn d’un centeat de persones ena sua placeta de deuant.

Estreada per prumèr còp en 1900, Tosca ei considerada era òbra mèstra de Giacomo Puccini, compositor coneishut tanben per títols coma Manon Lescaut, La Bohème o Turandot. Tosca ei, ath delà, eth nòm dera protagonista dera opèra, qu’amassa damb es personatges de Cavaradossi e Scarpia, complèten un triangle viscerau perfècte. Òdi, amor, passion, violéncia e religion se traparan en uns tempsi de fòrça conflictes ena Ròma de Napoleon.

Coma valor hijut, en prumèr entreacte, a compdar des 23 ores, eth public poderà visitar era exposicion “Er art dera harga” laguens dera sala d’exposicions e tanben s’aufrirà vin caud. Vos animam a assistir ad aguesta experiéncia e participar-i en tot compartir es vòstes fòtos e comentaris damb eth hashtag #LiceuALaFresca, que pendent er entreacte pòden aparéisher peth Canal 33.

Se non vos trapatz ena Val d’Aran aqueth dia, vos facilitam eth link entà poder consultar totes es poblacions qu’acuelheràn aguest eveniment: https://www.liceubarcelona.cat/sites/default/files/liceu_a_la_fresca/liceu_fresca_municipis_250619.pdf

Info: Musèus dera Val d’Aran