• Alumnes de 3au e 4au de primària des escòles dera Val d’Aran: Escòla Garona de Vielha, Escòla Sant Ròc de Bossòst, Escòla Estudi Alejandro Casona de Les e ZER Val d’Aran auràn er esquí coma ua matèria mès laguens dera matèria d’educacion fisica en marc dera 4au fasa deth programa “Espòrt Blanc Escolar”.

 

Eth Conselh Generau d’Aran a estat era sedença dera presentacion deth Programa Espòrt Blanc Escolar, laguens deth Plan Estrategic d’Espòrts d’Iuèrn de Catalonha, eth programa a er objectiu d’impulsar era iniciacion e era coneishença des espòrts d’iuèrn, enes sues diferentes modalitats, ena poblacion infantila.

Era presentacion a compdat damb era preséncia deth vicesindic d’Aran e conselhèr d’Espòrts, Luis Carlos Medina, dera delegada deth Govèrn en Naut Pirenèu e Aran, Rosa Amorós, deth deputat dera Deputacion de Lleida e president dera Union de Conselhs Esportius de Lleida, Joan Ubach, deth director des Servicis Territoriaus d’Ensenhament, Miquel Àngel Cullerés, deth president dera Federacion Catalana d’Espòrts d’Iuèrn (FCEH), Oscar Cruz, e deth representant territoriau dera Secretaria Generau der Espòrt, Joan Segura.

 

 

180 alumnes de tresau e quatau de primària des escòles dera Val d’Aran: Escòla Garona de Vielha, Escòla Sant Ròc de Bossòst, Escòla Estudi Alejandro Casona de Les e ZER Val d’Aran (Naut Aran) auràn er esquí coma ua matèria mès laguens dera matèria d’educacion fisica en marc dera 4au fasa deth programa “Espòrt Blanc Escolar”.

Es alumnes realizaràn un totau de 8 sessions annaus laguens der orari lectiu a on ena estacion d’esquí aranesa de Baqueira Beret apreneràn es nocions basiques des tres modalitats d’esquí mès abituaus, esquí nòrdic, aupin e surf de nhèu (snowboard), o poderàn perfeccionar se ja ne saben. Eth programa includís tres jornades d’esquí de hons, dues d’esquí aupin, dues de surf de nhèu e ua de freeride.

 

 

Eth president dera Federacion Catalana d’Espòrts d’Iuèrn (FCEH), Oscar Cruz, a manifestat: “En aguesta quatau fasa uns 1.500 alumnes de tresau e quatau de primària d’uns 40 centres deth Pirenèu participen en programa. Dempús de tres ans, eth programa s’avalore fòrça positivaments, pr’amor qu’a diferéncia d’auti programes de nhèu en aguest pòden participar toti es alumnes. Era montanha represènte un futur esportiu e economic, ath delà d’ua opcion professionau”.

 

 

En paraules deth deputat, Joan Ubach: “Eth programa Espòrt Blanc Escolar vò promòir era practica der esquí e tanben potenciar valors coma eth respècte e era coneishença deth miei ambient e des montanhes deth Pirenèu”.

 

 

Miquel Àngel Cullerés, director des Servicis Territoriaus d’Ensenhament, a soslinhat: “Aguest programa a un doble objectiu, per un costat era activitat fisica damb es diuèrses modalitats der esquí e per aute costat era coneishença deth medi.”

 

 

Pera sua part, eth vicesindic d’Aran e conselhèr d’Espòrts, Luis Carlos Medina, a manifestat: “Maugrat que semble paradoxal, en territòri deth Pirenèu i an persones qu’an practicat pòc o bric es espòrts d’iuèrn. Aguest programa permet difóner e promòir era practica des espòrts mès tanben era cultura e es valors dera nhèu e era montanha qu’en nòste territòri pòden supausar un mejan de vida e diuèrses gessudes esportiues e professionaus”.

Era Deputacion de Lleida apòrte amassa damb era Secretaria Generau der Espòrt un totau de 370.500 èuros entà corbir eth còst des tecnics e monitors, es forfaits, part deth transpòrt e part deth loguèr deth materiau. Aguest ei eth resultat dera formalización d’un convèni de collaboracion signat entre era Deputacion de Lleida e eth Conselh Catalan der Espòrt.

Ena demarcacion de Lleida i participen aguest cors uns 894 alumnes de 3au e 4au de primària de 18 escòles dera Val d’Aran, era Alta Ribagorça, eth Pallars Sobirà, eth Pallars Jussà, er Alt Urgell e eth Solsonès.

 

 

Eth projècte s’amie a tèrme gràcies ath Departament d’Ensenhament damb es centres educatius des nau comarques deth Pirenèu, era Secretaria Generau der Espòrt, en collaboracion damb es conselhs esportius de cada comarca, e era Federacion Catalana d’Espòrts d’Iuèrn pera formacion des tecnics d’espòrts d´iuèrn e era coordinacion tecnica deth programa.

Tanben compde damb era cooperacion deth Conselh Generau d’Aran entath transpòrt escolar e entà facilitar a un prètz redusit es forfaits e eth materiau.

 

 

 

 

Vielha, 8 de hereuèr de 2017

 

Conselh Generau d’Aran: Núria Sanjuan