• Aguesta dusau edicion a amassat a investigadors, administracions e ciutadania en ua jornada qu’a combinat divulgacion, activitats familiaus, cultura e productes de proximitat.

Aguest dissabte es carrèrs de Vilamòs s’an aumplit en motiu dera 2a Jornada Ovihuec, un eveniment qu’a congregat a scientifics, investigadors, administracions, e ciutadania damb er objectiu de hèr a conéisher eth projècte Ovihuec.sost e reflexionar sus era importància dera ramaderia extensiva ena conservacion deth paisatge, era biodiversitat e era prevencion d’incendis.Organizada per HèPic, eth centre d’innovacion territoriau deth Conselh Generau d’Aran, er Ajuntament de Vilamòs,  e er IRTA, damb era collaboracion d’Aran pera Natura, era jornada a combinat ponéncies tecniques damb activitats divulgatives, culturaus e en familha entà apropar eth projècte ara ciutadania.

Eth conselhèr d’Innovacion deth Conselh Generau d’Aran e baile de Vilamòs, Oriòl Sala, a explicat que: “aguesta dusau edicion nèish damb era volontat de  hèr a conéisher era importància deth sector primari deuant eth risc d’incendi forestau, a on controtlar er embòsc ei ua qüestion de grana importància, e atau garantir es vides des persones”.

Eth programa a convocat a expèrts de diferenti sectors entà tractar es rèptes dera ramaderia extensiva damb ua perspectiva scientifica, ambientau e territoriau. Entre es expèrts i ère er investigador en benèster animau der IRTA e coordinador scientific deth projècte Ovihuec.sost, Antoni Dalmau, qu’a participat en ua convèrsa damb eth responsable d’Innovacion deth Conselh Generau d’Aran, Guilhèm Piris, sus com era ramaderia extensiva pòt contribuïr a ua gestion mès sostenibla deth paisatge e des territòris de montanha.

En aguest sens, Dalmau a explicat qu’eth projècte Ovihuec.sost “combine coneishença scientifica, tecnologia e de gestion deth territòri entà compréner quin impacte a era ramaderia extensiva ena vegetacion, era biodiversitat, era prevencion d’incendis e eth benèster animau, atau com entà méter en valor es servicis ecosistemics que proporcionen es ramats”. Eth coordinador scientific deth projècte a hijut que: “tot aguest saber a de servir entà desvolopar modèls de gestion que se poguen adaptar e aplicar en d’auti territòris de montanha”.

Ath delà des ponéncies, era jornada a compdat damb un mercat de productes de proximitat, activitats en familha sus biodiversitat, talhèrs, accions culturaus e un dinar popular elaborat damb carn d’anhèth deth ramat d’Ovihuec, era recaptacion deth quau se destinarà totauments ara Associacion Contra eth Càncer ena Val d’Aran.

Un ramat public ath servici deth territòri

Ovihuec.sost ei un projècte impulsat per Ajuntament de Vilamòs, eth Conselh Generau d’Aran e er IRTA, qu’analise e valide era ramaderia extensiva coma instrument de gestion forestau e de prestacion de servicis ecosistemics.

Eth projècte combine era gestion d’un ramat public de oelhes e crabes damb tecnologies com es barraments virtuaus e es sistèmes de geolocalizacion entà estudiar-ne er impacte sus era vegetacion, era biodiversitat, eth benèster animau e era prevencion d’incendis. Er objectiu ei generar evidéncia scientifica que permete desvolopar modèls replicables en d’auti territòris de montanha.

Ovihuec.sost compde damb eth supòrt dera Fondacion Biodiversitat deth Ministèri entara Transicion Ecologica e eth Rèpte Demografic (MITECO), a trauès deth cofinançament deth Hons Europèu de Desvolopament Regionau (FEDER).

Vielha, 3 d’agost de 2026