En Pirenèu, volem decidir qu’a estat eth lèma escuelhut pes representants deth mon locau e regionau d’Aran e es Pirenèus catalan, aragonés, navarrés, andorran e francés amassadi aué en Les entà pr’amor de preservar “eth dret des persones en desvolopament deth sòn projècte vitau” e entà “possar politiques conservacionistes” entàs activitats ambientaus, sociaus e economiques presentes en territòri, atau coma a referit en nòm d’eri eth sindic d’Aran, Francés Boya.
 

En ua trobada plan participada, s’i a signat eth manifèst –qu’a dat nòm ara amassada e ara posteriora manifestacion- per miei deth quau s’inste as institucions dera Union Europèa, er Estat espanhòu, francés e andorran atau coma ara Generalitat de Catalonha entà crear un grop de trabalh qu’abòrde “es factors de conservacion des nòstes montanhes”, esvitar “definitivament” es efèctes negatius deth programa LIFE e garantir era activitat ramadèra e des activitats tradicionaus, segontes se recuelh en document (veir adjunh).

Damb aguest esperit e entà que fin finau amassades coma era d’aué devenguen un vertadèr “Senat deth Pirenèu”, eth Sindic s’a felicitat pera capacitat de respòsta des congregadi “contra era imposicion des politiques promoigudes des de París, Madrid o Barcelona” qu’acuelh eth territòri, e a emplaçat as representants entà “articular ua estratègia de futur” a trauèrs deth trabalh conjunt ena creacion des grops de gestion territoriau en matèria mieiambientau.