• Era publicacion, lidèr de geografia e viatges en Catalonha, base es articles de portada dera edicion d’octobre enes estampes mès espectaculares dera tardor aranesa.

• Eth numèro se presentarà eth dimars 29 de seteme, tàs 18 h, ena Sala d’Actes deth Conselh Generau d’Aran, en Vielha.

Aguest mes d’octobre, era revista Descobrir dedique eth sòn dossièr centrau a explicar era espectacularitat des paisatges d’Aran ena tardor. Ath long de mès de seishanta pagines e a trauès de quate reportatges extensi, aguest numèro propòse ua passejada pes milhors bòsqui entà contemplar er esclat de colors que viu era natura en aguesta sason; prepausen as lectors es milhors rotes pes sies terçons; mos guiden pes pòbles mès polidi dera Val que cau visitar e paren era taula enes restaurants de codina aranesa. Es fotografies —inedites— qu’acompanhen es reportatges deth dossièr centrau son deth fotograf Òscar Rodbag.

Damb era arribada d’octobre, era natura comence a desplegar era sua paleta de colors mès extraordinària en vessant atlantic des Pirenèus. Aran n’ei un exemple unic. Atau ac explique era jornalista e musicològa Sofia Cabanes, que signe eth prumèr article deth dossièr e prepause as lectors un recorrut pes bòsqui a on era tardor se convertís en un espectacle cromatic efimèr e unic, ath costat d’ua seleccion des milhors guardaders a on contemplar-les.

Aran consèrve com un des sòns principaus trèts distintius era division istorica e administrativa d’origina medievau en sies terçons, que servissen entà gestionar amassa er autogovèrn. Eth jornalista Iñaki Delaurens explique en dusau reportatge deth dossièr quini son aguesti territòris e recomane ua rota per cada un d’eri entà hèr-les a pè.

Eth tresau reportatge deth numèro arribe dera man dera jornalista Anna Geli, que se fixe enes glèises romaniques, es institucions medievaus e es pòbles que consèrven mòles e castèths antics, un patrimòni que mòstre era singularitat d’aguest territòri occitan. Tanben prepause visitar quauqu’uns des musèus e equipaments d’Aran qu’apregondissen ena sua istòria e ena sua identitat: deth gran musèu de Vielha enquias espacis dedicadi ara nhèu, as hèstes deth huec o ara vida tradicionau.

Mercada per sègles d’isolament e damb influéncies occitanes, era codina aranesa manten un perfil pròpi. Misharnons, caça e restaurants de montanha alimenten ua gastronomia estacada ara tèrra. Eth periodista e cap de redaccion dera revista Cuina, Ferran Caldés, mos hè a vier gana damb un reportatge que met eth paisatge en plat e amasse era istòria damb eth territòri.
Barre eth conjunt d’articles deth dossièr centrau un tèxte dera jornalista e presentadora der espaci de notícies en aranés deth canau 3Catinfo Ares Riu, qu’explique que ja hè ans que se n’anèc d’Aran, e que damb eth temps a descurbit qu’era Val tostemp a format part d’era e qu’era tardor ei era sason que la torne a connectar damb es arraïtzes e era familha. Acompanhe eth tèxte ua illustracion signada per Xavier Mula.

Eth reportatge includís tota era informacion practica entà botjar-se peth país (lotjaments, restaurants, activitats, rotes, prepauses d’espacis que cau visitar, webs d’informacion toristica, e tanben ua prepausa de banda sonora) entà qu’es lectors poguen planificar era sua estada en Aran.

Aguest numèro se presentarà eth dimars 29 de seteme, tàs 18 h, ena Sala d’Actes deth Conselh Generau d’Aran, en Vielha (plaça d’Aran, 1-2). En acte i participaràn eth conselhèr de Torisme Josep Canut; er editor dera revista Descobrir, Joan Morales, e quauqui collaboradors deth reportatge.

Vielha, 24 de seteme de 2026