• Aguest servici, que serà actiu enquiath 3 de seteme, permet que persones de totes es edats e condicions poguen gaudir d’aguest endret tant emblematic dera Val d’Aran, ath temps que regule er accès e redusís era circulacion de veïculs entà accedir-i.

Eth Conselh Generau d’Aran a metut aué en foncionament eth tren toristic dera Artiga de Lin enquiath 3 de seteme. Enguan, un an mès, aguest servici s’ampliarà pendent eth mes d’agost damb un tresau veïcul entà evitar aglomeracions en parçan e escuerçar es tempsi de demora des usatgèrs e usatgères.

Era regulacion der accès motorizat ara ribèra deth Joèu limite er accès as veïculs non autorizadi ara zòna, pr’amor d’açò eth servici deth tren toristic permet que visitants de totes es edats e condicions poguen gaudir d’aguest paratge d’ua forma mès sostenible e respectuosa damb eth miei ambient.

Entath vicesindic e conselhèr de Governacion, Innovacion, Economia e Torisme, Amador Marqués: “aguesta iniciativa, que compde ja damb ua longa trajectòria, possibilite a quinsevolh persona accedir a un endret tant emblematic dera Val d’Aran e, tanben, ajude a regular er accès ara Artiga en ua epòca de nauta afloéncia”.

Eth tren toristic foncionarà en orari de 10:00 a 17:00 ores (eth darrèr trajècte de pujada s’amiarà a tèrme entàs 16:30). Es tickets se poiràn aquerir en Centre d’Interpretacion dera Artiga de Lin.

Eth prètz deth trajècte serà de 2 euròs entàs adults, 1 eurò entàs menors d’11 ans e 1 eurò entàs gossets. Es menors de 3 ans non an de besonh entrada.