- Segontes es donades der informe PLAENSA realizat peth Servei Català de Salut.
- Es pacients enquestadi an incrementat era avaloracion generau dera atencion medicau recebuda entre 2023 e 2026 de 5,63 a 8,29 punts.
En informe PLAENSA de 2026 realizat peth Servei Català de Salut, es Urgéncies dera Val d’Aran lidèren 5 des 24 aspèctes valoradi en conjunt de Catalunya. En aguesti darrèri ans, de 2023 a 2026, s’a melhorat fòrça en diuèrsi ahèrs coma: era informacion sus es pròves, era informacion comprensibla, es permisi entà informar as acompanhants, eth tracte personau d’infirmieria e era sensacion d’èster en bones mans.
“Aguesti resultats son eth reflèxe deth compromís diari d’ues equipes que trabalhen damb professionalitat, proximitat e vocacion de servici. En un espitau coma eth nòste, era qualitat assistenciau non depen sonque dera tecnologia o des recorsi disponibles, depen sustot des persones e dera manèra coma suenham, informam e acompanham as que confien en nosati” soslinhe Maria Àngels Borràs, directora deth Servici Aranés de Benèster e Salut (SABS). E ahig que “naturaument, encara auem aspèctes a melhorar. Es enquèstes mos ajuden justaments a indentificar-les e a contunhar en tot auançar, mès tanben credem qu’ei important arreconéisher eth trabalh hèt e méter en valor aquerò que mos diden es madeishi pacients pr’amor qu’era melhor manèra de saber se hèm ben es causes ei escotar as persones qu’atiem. Gràcies ara confidança des pacients, sabem qu’er Espitau Val d’Aran ei un servici d’urgéncies que non sonque resòlv problèmes de salut tanben genère confidança, tranquilitat e proximitat quan mès s’an de besonh”.
Pera sua part, era sindica d’Aran, Maria Vergés, a volut méter en valor era importància de compdar ena Val d’Aran damb uns servicis sanitaris de proximitat e damb professionaus pleaments comprometudi damb eth territòri, sustot quan parlam d’un servici tan fondamentau coma eth d’emergéncies. Atau madeish a hijut que “Era valoracion des madeishi pacients ei un des milhors indicadors entà saber coma foncione eth nòste sistèma sanitari, es persones que receben era atencion son es qu mos ajuden a detectar que hèm ben e en qué auem de contunhar milhorant.” En aguest sens era Sindica a volut destacar “Eth trabalh de tot eth personau der Espitau dera Val d’Aran e, en especiau, deth servici d’Urgéncies, pr’amor d’aguesti resultats son tanben un reconeishement ath sòn compromís damb era ciutadania.”
Vielha, 25 de seteme de 2026