- Aguest projècte, que comence aguest deluns 3 d’agost, permeterà disposar d’ues installacions mès modèrnes, eficientes e adaptades as estandards actuaus de qualitat, seguretat alimentària e as naues exigéncies dera normativa sanitària.
- Es òbres compden damb un pressupòst de 603.277,70€, auràn ua durada de 4 mesi e ath long de tot aguest temps s’abilitarà un sistèma de linha heireda entà garantir era produccion de minjar.
Aran Salut comence un projècte estrategic entà renauir complètaments era codina der Espitau Val d’Aran, entà poder disposar d’ues installacions mès modèrnes, eficientes e adaptades as estandards actuaus de qualitat, seguretat alimentària e as naues exigéncies dera normativa sanitària.
Era reforma prevé era renovacion integrau des espacis de trabalh, era reorganizacion des circuïts de recepcion, emmagazinatge, preparacion e distribucion des aliments, e era modernizacion des installacions d’electricitat, climatizacion, ventilacion, sanejament e des sistèmes de supòrt de besonh entà optimizar eth foncionament dera codina. Damb er objectiu de melhorar era eficiéncia des procèssi, refortir era seguretat alimentària, adaptar er espaci as naui besonhs sanitaris e aufrir ues melhors condicions de trabalh as professionaus.
Aguesta accion represente ua inversion de futur entà aufrir un servici d’alimentacion segur, eficient e de qualitat as pacients, residents e usatgèrs deth Espitau Val d’Aran.
Es trabalhs auràn ua durada d’uns 4 mesi e compden damb un pressupòst de 603.277,70€. Pendent era execucion des òbres, se meterà en marcha ua codina provisionau mejançant un sistèma de linha heireda, entà garantir era produccion de minjar.
“Èm deuant d’un projècte ambiciós e que tanben ei de besonh, de reforma integrau des installacions dera codina der Espitau Val d’Aran. Ua intervencion que mos permeterà modernizar es nòstes installacions, entà adaptar-les as necessitats qu’a er equipament aué. Era reforma d’ua codina espitalèra non ei un ahèr estetic, senon un besonh estrategic, sanitari e logistic de prumèr orde. Era infrastructura a on se preparen es minjars des pacients influís dirèctaments ena sua recuperacion, ena seguretat clinica e ena eficiéncia economica deth centre sanitari”, explique era directora deth Servici Aranés de Benèster e Salut (SABS), Maria Àngels Borràs. E hig que “modernizar era nòsta codina ei, en definitiva, aumentar era qualitat assistenciau e plaçar eth benèster deth pacient en centre dera nòsta gestion”.
Vielha, 30 de junhsèga de 2026