Eth telecagira transportarà 1.800 persones per ora e descongestionarà era gessuda d’esquiaires des de Beret entà Baqueira
Vielha, 23 de junh de 2016.- Era Comission Territoriau d’Urbanisme dera Val d’Aran, presidida peth director generau d’Organizacion deth Territòri e Urbanisme, Agustí Serra, amassada aguest maitin ena sedença deth Conselh Generau d’Aran, a aprovat eth projècte entà installar un telecagira ena estacion d’esquí de Baqueira Beret, des dera còta 1.848 enquiara 2.090, en tot seguir eth traçat deth barranc de Blanheuar.
Eth nau remontador de pinça fixa de tres places aurà capacitat entà transportar 1.800 esquiaires per ora e eth sòn bastiment supausarà ua inversion de mès d’un milion d’èuros.
Eth projècte preve resituar er antic telecagira Vista Beret, desmontat hè dus ans, en ua zòna que servisque entà descongestionar era mobilitat interiora entre es zònes de Baqueira e de Beret. Eth nau telecagira servirà coma infrastructura de retorn des esquiaires entà Baqueira en cas d’aturada des installacions de Beret.
Era Comission a avalorat er interès public deth projècte e eth hèt que non existissen naues pistes associades.
Era Comission d’Urbanisme a aprovat tanben eth projècte de reforma e ampliament deth bar restaurant Bosque, plaçat ena còta 1.800 dera estacion de Baqueira Beret, entà dar refugi a mès esquiaires en cas de mau temps. Eth bastiment deth telecagira de Baqueira e eth parcatge public de Ruda an supausat ua aumentacion d’usatgèrs en aguesta zòna, e eth bar restaurant se saturaue en dies de maximala afluéncia.
Eth projècte supausarà passar d’ua superfícia bastida de 1.541m2 a 2.774m2 entà atier 450 persones e supausarà ua inversion de pòc mès d’un milion d’èuros.
Era amassada d’aué dera Comission Territoriau d’Urbanisme dera Val d’Aran, a servit tanben entà acceptar eth desistiment deth bastiment deth refugi de nauta montanha de Coret de Mont, que segontes eth sindic d’Aran, Carlos Barrera, “auie generat preocupacion e malestar entre es vesins de Mont”. Eth sindic d’Aran, a explicat que “era madeisha enterpresa interessada en bastiment deth refugi e en amiar a tèrme eth projècte, ja ei en convèrses damb er ajuntament de Vilac, entà sajar arribar a un acòrd sus era futura ubicacion deth refugi”.