Vielha, 22 de deseme de 2017.- Eth Conselh Generau d’Aran s’a metut en contacte damb era Direccion Generau de Qualitat Ambientau e Cambi Climatic dera Generalitat de Catalonha entara elaboracion d’un estudi sus contaminacion acostica e d’emissions de gasi e dioxid de carboni ena carretèra N-230 ath sòn pas pera Val d’Aran.

Eth sindic d’Aran, Carlos Barrera, expliquèc qu’aguest estudi s’amiarà pendent eth periòde previst entàs òbres de consolidacion dera zòna inestable que met en perilh un tram dera carretèra N-125 (RD44) en França, ath sòn pas pera poblacion de Saint-Béat. Situacion de perilh qu’a motivat era restriccion de pas entàs veïculs de mès de 8,5m de longitud ath sòn pas per aguesta poblacion, e que suberven de manèra dirècta sus aguest tipe de transpòrt que circulaue jornalièraments pera N-230 en direccion França.

Se ben er estudi sus emissions de gasi s’amiarà basat en paramètres mercadi pera nòrma dera UE, era medicion de contaminacion acostica s’a de hèr en situacion comparativa de trafic, qu’actuauments e pes circonstàncies anterioraments descrites, ei eth moment de realizà’c sense eth trafic jornalièr de camions.

Eth Conselh Generau d’Aran a coneishença dera imminenta publicacion deth tramit d’informacion publica der estudi de melhores dera N-230 redigit peth Ministèri de Foment.

Pendent aguest periòde d’informacion publica eth Conselh Generau d’Aran verificarà s’era prepausa redactada peth pròpri Conselh Generau coïncidís damb era prepausa deth Ministèri, en cas de que age quauqu’un des aspèctes sometudi peth Conselh Generau d’Aran, que non sigue recuelhut peth Ministèri de Foment, se presentaràn es allegacions apertientes e ath delà s’incorporarà er estudi mieiambientau entà daurir un possible debat de rotes alternatives entath transpòrt pesat.

Segontes eth critèri deth Conselh Generau d’Aran eth territòri aranés ei considerat mediambientaument sensible, e incompatible entà contunhar en tot suportar eth volum trafic jornalièr de transpòrt pesat.

Cap arrebrembar qu’er estudi de melhores urgentes dera N-230 ath sòn pas pera Val d’Aran incorpòre eth bastiment de rotondes enes crotzi mès perilhosi, era de connexion dera N-230 damb era N-260, e eth horcadís dera carretèra dera Val de Boí, e eth bastiment de 13 km de tresau carril d’auançament que poderie èster reversibla, unicaments entà torismes enes zònes d’orografia mès favorabla, entà dotar de major seguretat as auançaments, en tot auer en compde qu’es trams d’auanç actuau son absoludaments insufisenti en relacion ath transpòrt pesat que absorbís jornalièraments era N-230. Eth pressupòst d’aguestes accions segontes aguest estudi ei de 90 milions d’èuros.

Fin finau, Barrera s’a referit a qu’era situacion actuau ena N-230, sense pas de camions, mos retorne en paramètres de seguretat vial ath decènni des 70.