Eth Conselh Generau d’Aran inicie eth plan de contingéncia sanitària deuant deth COVID-19

Des deth govèrn deth Conselh Generau d’Aran s’informe qu’aguest plan, dessenhat pes professionaus sanitaris, establís es diuèrsi scenaris que podem patir enes pròplèu dies, enes que se prevé un aument des casi positius e des visites ar airau d’urgéncies der Espitau Val d’Aran, atau coma es accions e mesures que s’agen d’anar prenent en cada moment.

Atau donc, s’a procedit a reorganizar es espacis der Espitau entà poder acuélher as usatgèrs que poguen arribar autant a nivèu d’urgéncies coma d’ospitalizacion. S’an isolat zònes entà atier exclusivament a pacients damb simptomatologia respiratòria e s’a procedit, dera man de Pompièrs Emergéncies, a installar en parcatge der Espitau, un espitau de campanha (PMA) entà balhar supòrt ar airau d’urgéncies e que foncionarà, en cas que sigue de besonh, coma zòna d’accès, triatge e demora des pacients damb simptòmes respiratòris. S’a procedit tanben ara reorganizacion intèrna des professionaus entà auer eth maxim de personau disponible.

En aguest sens, eth govèrn deth Conselh Generau d’Aran vò tornar a arregraïr er important esfòrç e trabalh qu’amien a tèrme toti es professionaus d’Aran Salut, SABS e Pompièrs Emergéncies entà afrontar aguesta situacion, e insistís en besonh de complir damb es indicacions des autoritats sanitàries e demorar en casa. Atau madeish, rebrembe qu’a metut a disposicion dera ciutadania eth telefon 973643152 (de 8’00h a 20’00h) tà quinsevolh dubte o besonh ath torn deth coronavirus.

S’informe tanben qu’aguest plan pòt anar variant en foncion de coma pogue evolucionar era situacion.

Comments are closed.