Mès de 3.100 documents consultables a trauèrs dera opcion “Archiu en linha: Cercador de hons e documents”

Eth hons documentau deth Conselh Generau dera Val d’Aran ja se pòt consultar integrament en linha a trauèrs dera opcion: “Archius en linha: Cercador de hons e documents” der Hiltat d’Archius Comarcaus. Pendent cinc ans s’an digitalizat 3142 documents, un totau de 15.351 imatges, damb un volum de memòria de 351,5 GB.

Es prumèrs trabalhs se produsiren er an 2009, laguens deth programa de preservacion documentau de Catalunya “Esteve Gilarber Bruniquer”, a on se digitalizèren es 3 libres d’actes (1632-1936) dera maxima institucion aranesa. Enes mesi de junhsèga e agost de 2010, se trebalhèc ena digitalizacion de 881 unitats documentaus. En 2011, es trabalhs contunhèren damb era digitalizacion de 308 unitats. Uns 2.000 documents se digitalizèren en mes d’agost de 2013 laguens deth Plan Bruniquer d’aqueth an.

Toti es trabalhs de digitalizacion s’an hèt en tot seguir es parametres de captura dera guida de digitalizacion der Hilat d’Archius Comarcaus e es fichèrs digitalizats ja an estat carregats en depòsit digitau des Archius de Catalunya (DIDAC). Era documentacion a estat inventariada damb eth programari de Gestion Integrau des Archius Comarcaus (GIAC).

Eth hons arremasse informacion sus era administracion generau dera maxima institucion aranesa, sus era administracion reiau e militara delegada en Aran e sus es relacion dera Val d’Aran damb França e damb era glèisa. Es unitats documentaus que se pòden consultar son datades entre 1316 e 1936. Destacam es privilègis reiaus autrejats ara Val d’Aran, es libres d’acòrds e es compdes.

Se pòt accedir ara consulta en linha deth hons en següent enlaç: http://extranet.cultura.gencat.cat/ArxiusEnLinia/